Здравје: Седум причини зошто треба често да јадете краставици

Охрид, 5. јуни 2024 (ОХРИДПРЕС) – Краставиците се зеленчук што многу луѓе сакаат да го јадат во потоплите денови, особено во текот на летото кога се јаде како додаток во оброците или се ужива во нив како салата или друга освежителна закуска.

Овој зеленчук се состои од речиси 95 проценти вода и е нискокалоричен, што го прави одличен избор за јадење во текот на летните месеци.

Покрај тоа што е вкусна и освежителна, редовното консумирање на краставицата се поврзува и со различни здравствени придобивки, како што се слабеење, подобар крвен притисок и слично. Еве седум здравствени придобивки поврзани со редовното јадење на овој популарен зеленчук.

Го подобруваат здравјето на кожата

Краставиците содржат многу вода и антиинфламаторни својства кои можат позитивно да влијаат на здравјето и изгледот на кожата. Доколку се консумираат често, со текот на времето можат да ја ублажат иритацијата, да ги намалат отоците и да и’ дадат на кожата свеж изглед. Покрај за јадење, краставиците се користат и за нега на кожата, особено ако се ставаат на очите за да се намали отеченоста и темните кругови.

Содржат хранливи материи

Краставиците немаат многу калории, но се одличен извор на хранливи материи. Содржат витамини Ц и К, калиум, магнезиум и манган – хранливи материи кои го поддржуваат целокупното здравје. Јадењето краставици во различни комбинации помага да се внесат потребните хранливи материи во организмот, а со оглед на малиот број на калории, не треба да се плашите од количината што ја внесувате.

Ја подобруваат хидратацијата на организмот

Краставиците се 95 проценти вода, што ги прави одличен зеленчук кој ќе ви помогне да бидете хидрирани. Јадењето краставици помага да се одржи доволна количина течност во телото, особено за време на топлите денови или по интензивна физичка активност, како што е тренингот.

Помагаат при слабеење

Поради високата содржина на вода и нискиот број калории, краставиците се идеална храна за секој кој сака да изгуби тежина. Овој зеленчук ќе ви помогне да се чувствувате сити и да го спречите прејадувањето, а со тоа ќе го намалите вкупниот внес на калории. Краставиците се многу популарни во салати, здрави се и освежителни, поради што се особено популарни во текот на летото.

Содржат антиоксидантни својства

Краставиците се богати со антиоксиданси, вклучувајќи флавоноиди и танини, кои помагаат во борбата против оксидативниот стрес и го намалуваат воспалението во телото. Овие антиоксиданси можат да го намалат ризикот од развој на хронични болести.

Го подобруваат варењето

Еден од зеленчуците кој позитивно влијае на здравјето на дигестивниот систем се токму краставиците, а причината е содржината на влакна во нив. Тие влијаат на правилното и добро функционирање на дигестивниот систем. Јадењето краставици помага во регулирање на работата на дебелото црево, спречува запек и влијае на целокупното здравје на цревата.

Помагаат да се контролира нивото на шеќер во крвта

Покрај сето горенаведено, краставиците можат да помогнат и во контрола на нивото на шеќер во крвта. Јадењето краставици може да помогне да се намали нивото на шеќер во крвта и да се спречат компликации поврзани со дијабетес. Краставиците содржат низок гликемиски индекс, што ги прави одлична храна за дијабетичари. (Крај)

извор: ОхридПрес фото: архива

@OhridPress - Преземањето на оваа содржина или на делови од неа без непосреден договор со редакцијата на OhridPress значи дека се согласувате со условите за преземање, кои се објавени тука