Денеска и утре посебни безбедносни мерки во центарот на Охрид
Охрид, 11. јули 2024 (ОХРИДПРЕС) – Со цел непречено одвивање на предвидените активности пред отворањето на годинешниот фестивал „Охридско лето“, СВР Охрид денеска и утре, 11-ти и 12-ти јули 2024 година, ќе преземе посебни безбедносни мерки.
– Во делот на сообраќајот, на кеј „Македонија“ и улиците „Абас Емин“, „Гоце Делчев“ „Кирил и Методиј“, како и кај паркинг просторот кај „Горна Порта“, ќе биде забрането запирање и паркирање на патнички и други моторни возила. На овие, но и на приодите кон Античкиот театар ќе има присуство на полициски службеници кои ќе вршат физичко регулирање на сообраќајот и непречено движење на возилата со придружба. Предвидени се и други безбедносни мерки на подрачјето, информираат од СВР Охрид.
Апелираат до граѓаните, поради огромното значење на фестивалот на домашен и меѓународен план, да покажат разбирање за мерките, да ги почитуваат насоките на полициските службеници и со цел избегнување сообраќаен метеж, доколку немаат итна и неодложна потреба, да се воздржат од користење на своите приватни возила. (Крај)
извор: ОхридПрес фото: ОхридПрес
| @OhridPress - Преземањето на оваа содржина или на делови од неа без непосреден договор со редакцијата на OhridPress значи дека се согласувате со условите за преземање, кои се објавени тука |
