Календар на МПЦ-ОА: Светите апостоли Прохор, Никанор, Тимон и Пармен

Охрид, 10. август 2024 (ОХРИДПРЕС) – Православните христијани денес го празнуваат споменот на Светите апостоли Прохор, Никанор, Тимон и Пармен.

Четворицата беа од бројот на Седумте ѓакони и од Седумдесетте апостоли. Останатите тројца ѓакони беа: Стефан, Филип и Николај. Првомаченикот Стефан се празнува одделно на 27-ми декември, а Филип на 11-ти октомври. Николај не влезе меѓу светителите заради ерес.

А првите четворица немаат посебен ден за празнување, туку сите се спомнуваат на денешен ден. Прохор беше ракоположен од светиот апостол Петар за епископ Никомидиски. Извесно време беше на служба кај свети Јован Богослов и на островот Патмос ги забележа откровенијата што ги слушнал од устата на светиот Јован.

Потоа се врати во Никомидија, каде вложи голем труд за обраќање на народот во верата. Маченички се упокои во Антиохија, каде беше убиен од неверници. Свети Никанор пострада во Јерусалим истиот ден кога и светиот архиѓакон Стефан, а набрзо по него пострадаа и две илјади други христијани, кои беа убиени од зли Евреи.

Тимон беше епископ во Арабија и пострада за Христа на крст. Пармен умре пред очите на апостолите и тие го оплакаа и го погребаа.

Тропар

Вие ученици на Божјото Слово, вие носители на Духот Свет, вие јагниња на колење поведени, Прохоре, Никаноре, Тимоне и Пармене, апостоли и ѓакони, маченички телото ваше на земјава избледе, но затоа на Небесата кон хорот на светиите припоени, се молите за родот човечки, да ги пополни празнините ангелски. (Крај)

извор: mpc.org.mk фото: архива

@OhridPress - Преземањето на оваа содржина или на делови од неа без непосреден договор со редакцијата на OhridPress значи дека се согласувате со условите за преземање, кои се објавени тука