Календар на МПЦ-ОА: Преподобен маченик Дометиј

Охрид, 20. август 2024 (ОХРИДПРЕС) – Православните верници денес го одбележуваат денот посветен на Преподобен маченик Дометиј.

Роден е во Персија како незнабожец, во времето на царот Константин. Како момче се запозна со верата Христова, го остави незнабоштвото и се крсти. Толку ја засака вистинската вера, што напушти сè светско и се замонаши во еден манастир кај градот Нисивија.

Во братството поживеа некое време, па се оддалечи на безмолвие кај некој архимандрит Нурвел, за кого се вели дека шеесет години не јадел ништо варено. Старецот Нурвел го ракоположи за ѓакон, а кога сакаше да го принуди и во чин на свештеник, Дометиј побегна во некоја пустинска гора и се насели во една пештера.

Достигна толкаво совршенство низ постот, молитвата, бдението и богомислието, што исцелуваше болни. Кога во тие предели дојде Јулијан Отстапник, слушна за Дометиј, па испрати луѓе коишто го заѕидаа жив во пештерата заедно со неговите двајца ученици.

Така заврши овој Божји светител, во 363 година, и се пресели во Божјото Царство.

Тропар

Испоснички подвизувајќи се на гората, со Крстот како силно оружје, умното мудрување на демонските полкови го разруши, о ти блажен Дометие. Во мажествено мачеништво облекувајќи се, го погуби Копроним со мечот на верата; така ти, секогаш славен преподобномачениче, со двоен венец од Бога се овенча. (Крај)

извор: mpc.org.mk фото: архива

@OhridPress - Преземањето на оваа содржина или на делови од неа без непосреден договор со редакцијата на OhridPress значи дека се согласувате со условите за преземање, кои се објавени тука