Календар на МПЦ-ОА: Свети свештеномаченик Корнилиј стотникот

Охрид, 26. септември 2024 (ОХРИДПРЕС) – Православните христијани денес го празнуваат Денот посветен на Свети свештеномаченик Корнилиј стотникот.

Римјанин и римски офицер во Кесарија Палестинска. Крстен од апостолот Петар, според небесно откровение (ДАп. 10, 1). Беше прв од незнабошците што ѝ пристапија на Божјата Црква. Дотогаш некои мислеа дека Црквата Христова е само за Евреите и за оние што го примаат еврејското обрезание. Откако се крсти, Корнилиј остави сè и тргна по апостолот Петар.

Овој апостол подоцна го постави за епископ и го испрати во незнабожечкиот град Скипсеосис, каде што свети Корнилиј претрпе многу бесчестења и мачења заради Христа, но со сила Божја го урна храмот на Аполон и го крсти кнезот на тој град, Димитриј, и двесте седумдесет и седуммина незнабошци. Откако беше известен од Бога за денот на својата смрт, тој ги повика сите христијани, ги посоветува, се помоли на Бога за нив, и мирно се претстави кај Господ во својата чесна старост. Со време го заборавија неговиот гроб и стана запуштен.

Но, светителот му се јави на Троадскиот епископ Силуан и му јави за својот гроб, со заповед таму да подигне црква. Епископот го изврши тоа со помош на богатиот граѓанин Евгениј. Од моштите на Свети Корнилиј се извршија многубројни чуда.

Тропар

Господи Боже наш, Ти сираци не ги оставаш оние кои по ликот Твој чезнеат. Христос, о свети Корнилие, во познание те приведе тебе прв меѓу незнабошците, првина стана од Петар поучена, по чии молитви Спасителот нас нe милува, а противникот во осаменост најкрајна се оддалечува. (Крај)

извор: mpc.org.mk фото: архива

@OhridPress - Преземањето на оваа содржина или на делови од неа без непосреден договор со редакцијата на OhridPress значи дека се согласувате со условите за преземање, кои се објавени тука