Филмот „Сестри“ на Дина Дума утре и задутре ќе се прикажува во Охрид
Охрид, 8. февруари 2022 (ОХРИДПРЕС) – Македонскиот игран филм „Сестри“ на режисерката Дина Дума утре и задутре ќе се прикажува во Центарот за култура во Охрид.
Кино проекциите се од 19:00 часот во големата сала, а цената на влезниот билет е 100 денари. Притоа потребно е приложување на сертификат за имунизација со две дози вакцина против COVID-19 или потврда за прележан вирус во последните 45 дена, сметајќи од денот на оздравувањето.
Филмот „Сeстри” светска премиера имаше лани на Филмскиот фестивал во Карлови Вари, каде што ја освои специјалната награда на жирито во програмата „Источно од Западот“. Македонската премиера беше на 42-те „Браќа Манаки“. Филмот досега е прикажан на 20 интернационални фестивали, а ја освои и награда за најдобар игран филм од младинското жири на фестивалот Екс – граунд во Висбаден Германија.
Првиот филм на Дина Дума е избран и за македонски кандидат за наградата „Оскар“ за најдобар долгометражен интернационален филм.
„Сестри” е приказна за две тинејџерки чие пријателство е ставено на тест, кога тие се соочени со последиците од нивното декадентно однесување. Главните улоги ги толкуваат Антонија Белазелкоска и Миа Жиро. (Крај)
извор: ОхридПрес фото: архива
| @OhridPress - Преземањето на оваа содржина или на делови од неа без непосреден договор со редакцијата на OhridPress значи дека се согласувате со условите за преземање, кои се објавени тука |
