Бектеши: Забраната за извоз на одделни житарици и сончогледово масло продолжена за 30 дена до 15 мај, укината царината за увоз на масло за јадење до 31 мај

Скопје, 13. април 2022 (ОХРИДПРЕС) – На предлог на Министерството за економија во координација со Министерството за земјоделство, шумарство и водостопанство, Владата на последната седница донесе одлука да ја продолжи забраната за извоз на одделни житарици и сончогледово масло до 15-ти мај 2022 година.

Министерот за економија Крешник Бектеши вели дека согласно оваа одлука и во наредните 30 дена до 15 мај 2022 година ќе биде забранет извоз на: пченица и наполица, јачмен, пченка, брашно од пченица и наполица, семе од сончоглед-вклучувајки кршено или дробено, масла од семе од сончоглед, шафраника или мапуково семе и нивни фракции, пречистени или непречистени, но хемиски немодификувани, од сончоглед.

На предлог на Министерството за економија, Владата ја укина увозната давачка-царинска стапка за увоз на масло од сончоглед за јадење до 31-ви мај 2022 година.

– Потребата за продолжување на рокот за забрана за извоз за следни 30 дена односно по 15 април 2022 година до 15 мај 2022 година, како и да се укине царинската стапка за увоз на масло од сончоглед за јадење до 31 мај 2022 година е да се задржи тековната состојба на домашниот пазар од можноста на сериозни пореметувања поради недостаток на стоки, неопходно потребни за производството, преработката и за животот и здравјето на граѓаните, до новата реколта, како и дополнителен стимул за одржување на снабдување на домашниот пазар од растот на цените, напиша министерот Бектеши на Фејсбук.

Целта на овие мерки е заштита на домашниот пазар и граѓаните во време на криза за да се избегнат шпекулативни дејствија на трговците и производителите и за заштита на домашното производство, домашниот пазар и граѓаните. (Крај)

извор: ОхридПрес фото: архива