Петар Нечоски, Татјана Стефаноска, Ефто Пупиноски, Ѓоко Танески, Миле Кузманоски на плоштадот во Охрид за Нова година

Охрид, 23. декември 2022 (ОХРИДПРЕС) – Петар Нечоски, Татјана Стефаноска, Ѓоко Танески, Ефто Пупиноски, Миле Кузманоски и диџеите Багзи и Јана Слеј ќе ги забавуваат охриѓани и гостите за дочекот на Нова година во центарот на градот, објави денеска градоначалникот на Охрид, д-р Кирил Пецаков.

Новогодишната забава ќе започне во 20:00 часот, преку ден на 31-ви декември предвидена е и програма за најмладите, а забава ќе има и на 1-ви јануари.

– Новогодишната програма започнува на 31-ви декември на Градскиот плоштад од 12:00 часот кога ќе настапи хорот при КУД „Гердан од бисери“, а од 13:00 до 15:00 часот ќе има новогодишна театарска претстава „Дружината на Дедо Мраз“ и мјузиклот „Трите прасиња“. Вечерта од 20:00 часот на плоштадот ќе настапат Петар Нечоски, Татјана Стефаноска, Ѓоко Танески, Ефто Пупиноски, Миле Кузманоски и диџеите Багзи и Јана Слеј. Празничната програма продлжува на 1-ви јануари точно на пладне со настап на Марија Савеска и групата Камелеон, а интерес ќе привлече и проектот „И повторно евергрин“ со настап на Лидија Кочоска, Влатко Груески и Андреј Наунов, рече Пецаков.

Додава дека се очекуваат бројни туристи од земјава и странство. За новогодишните празници од буџетот на општината ќе се издвојат околу 2 милиони денари.

Градоначалникот Пецаков напомена дека оштината ќе се погрижи и за забавниот дел за време на Богојавленските празници. Засега е потврдено дека по чинот на осветување на езерските води, на 19-ти јануари на плоштадот „Св. Климент Охридски“ ќе настапи групата „Чалгија саунд систем“. (Крај)

извор: ОхридПрес фото: архива

@OhridPress - Преземањето на оваа содржина или на делови од неа без непосреден договор со редакцијата на OhridPress значи дека се согласувате со условите за преземање, кои се објавени тука