Иновативни кореографии, магија на сцена на годишниот концерт на студиото за танц „Соната“ (Фото)
Охрид, 16. јуни 2023 (ОХРИДПРЕС) – Уникатна мултимедијална претстава, што изобилуваше со неверојатни светлосни ефекти, филм, музика и секако – танц, во ова уживаше публиката присутна на синоќешниот годишен концерт на студиото за танц „Соната“ од Охрид.
Двата концерти беа распродадени, а по четири години „Некои нови дечки“ се вратија онаму каде што припаѓаат – на сцена.
Можеше да се погледнат иновативни кореографии, уникатни костими, магија на сцена придружена со специјални светлосни ефекти и визуелизации.
Дека заслужено настапуваат и ги собираат наградите на престижни натпревари во и надвор од земјава, покажаа и пред охридската публика. Изведбите на класичниот балет, современиот танц, латино танците и хипхопот со одлични кореографии, специјално подготвени за концертот, ја воодушевија публиката која со овации и аплаузи ги поздрави учесниците.
За следната танцова сезона која започнува од 1-ви септември, од „Соната“ најавија многу патувања, натпревари и концерти. (Крај)
извор: ОхридПрес фото: ОхридПрес
@OhridPress - Преземањето на оваа содржина или на делови од неа без непосреден договор со редакцијата на OhridPress значи дека се согласувате со условите за преземање, кои се објавени тука |