РЦСОО „Ванчо Питошески“ и Охрид домаќини на Меѓународниот натпревар на ученици од угостителски и туристички училишта GATUS 2023
Охрид, 25. септември 2023 (ОХРИДПРЕС) – Од четврток, 28-ми септември до 1-ви октомври Охрид преку Регионалниот центар за средно стручно образование и обука (РЦСОО) „Ванчо Питошески“ ќе биде домаќин на 11. Меѓународен натпревар на ученици од угостителски и туристички училишта – GATUS 2023.
Ќе се натпреваруваат околу 200 учесници од 15 училишта од земјите од поранешна Југославија. Во Охрид доаѓаат ученици од Марибор, Ново Место и Радовљица (Словенија), Опатија, Осијек и Сплит (Хрватска), Бања Лука и Приједор (Босна и Херцеговина/Република Српска), Белград, Смедерево и Лесковац (Србија), Бар и Херцег Нови (Црна Гора) и Охрид, Македонски Брод (Република Македонија).
Натпреварите ќе се одвиваат во хотелот „Метропол – Белви“ во дисциплините угостителско послужување и подготовка на туристички аранжман, со посебен акцент на планинскиот, рурален туризам.
На отворањето ќе се обратат претставник на Министерството за образование и наука, на локалната самоуправа од Охрид, како и директорот на РЦССО „Ванчо Питошески”, Марјан Радески.
На најдобрите и највештите учесници – ученици и ментори, ќе им бидат доделени златни и сребрени признанија.
Минатата година GATUS се одржа во Словенија, а охридските ученици имаа забележителен успех со освоени 2 сребрени и 1 бронзен медал. (Крај)
извор: ОхридПрес фото: архива
| @OhridPress - Преземањето на оваа содржина или на делови од неа без непосреден договор со редакцијата на OhridPress значи дека се согласувате со условите за преземање, кои се објавени тука |
