ФТУ домаќин на транснационална тренинг конференција за одржливи практики во кулинарството
Охрид, 31. октомври 2023 (ОХРИДПРЕС) – Охридскиот Факултет за туризам и угостителство (ФТУ) беше домаќин на втората транснационална тренинг конференција за одржливи практики во кулинарството и развој и генерирање на дигитални алатки и ресурси што ќе се користат во образованието.
Конференцијата е дел од проектот SCOOK во рамки на акцијата КА220VET од Еразмус + програмата.
Настанот се одржа во Охрид и Битола, а покрај професорите и студентите од ФТУ Охрид учествуваа професори и професионалци од АТУ универзитетот во Голвеј, Ирска, Едукативниот центар за кулинарство Медитеранео во Валенсија, Шпанија, Школата Жесе де Форест од Авен, Франција и Факултетот за биотехнички науки од Битола, Македонија.
– На конференцијата се одржаа серија работилници согласно целите на проектот кој се вклопува со приоритетите на ЕУ за одржлив развој како дел од Агендата 2030 на ОН. Беа одржани предавања во делот на развој и имплементирање на дигиталните алатки во образованието, како и теми поврзани со организирана целосна дигитализација во агроиндустрискиот сектор. Презентирани беа низа практични примери за одржливост во делот на прехранбената индустрија и кулинарството. Покрај тематските предавања, дискусии и обуки, беа организирани и теренски активности во Охрид и Битола, преку кои останатите партнери имаа можности да се запознаат со одржливост на производството во млекарската индустрија согласно стратегијата F2F, традиционални кулинарски практики како и со одржливо органско пчеларење, информираат од ФТУ Охрид.
Додаваат дека преку синергија на експертиза и искуство кое во проектот го носат сите партнери, како и дебатите, заклучоците од организираните активности, може да се констатира дека целите на проектот, се актуелизираат, промовираат и се реализираат според предвидената динамика. (Крај)
извор: ОхридПрес фото: архива
| @OhridPress - Преземањето на оваа содржина или на делови од неа без непосреден договор со редакцијата на OhridPress значи дека се согласувате со условите за преземање, кои се објавени тука |
