Дел од ортопедскиот тим на ЈЗУ „Св. Еразмо“ активно учествуваше на EFORT конгресот во Хамбург, Германија
Охрид, 29. мај 2024 (ОХРИДПРЕС) – Дел од ортопедскиот тим на ЈЗУ Специјализирана болница за ортопедија и трауматологија „Св. Еразмо“ од Охрид гостуваше на годинешниот 25-ти EFORT (European Federation of National Associations of Orthopaedics and Traumatology) конгрес, кој од 22-ри до 24-ти мај се одржа во Хамбург, Германија.
Д-р. Дамјан Танески, доктор по општа медицина, презентираше постер презентација на тема „Unraveling the diagnostic challenge: Myotonic dystrophy type I“.
Тимот на ортопеди – д-р. Огнен Шешоски, д-р. Атанас Поп-Стефанија и д-р. Александар Стевоски имаа постер презентации на тема „Ilizarov method for neglected rigid clubfoot deformity“ и „Correlation between preoperative radiological knee alignment and early postoperative functional knee score“.
– Специјалистите ортопеди имаа активно учество на конгресот со постер презентации кои беа особено пофалени од организаторите. На конгресот беа претставени најновите истражувања и достигнувања во областа на ортопедијата, а воедно нашите доктори имаа можност да се запознаат со колеги од целиот свет. Дополнително, со гордост го објавуваме и учеството на нашиот тим од општи доктори на медицина на 45-тиот Меѓународен медицински научен конгрес, кој се одржа од 24-27 мај во Охрид. Под менторство на д-р. Маја Божиновска- Смическа, нашите доктори активно учествуваа со постер презентација, која беше високо оценета од страна на конгресната комисија, информираат од болницата.
Додаваат дека учеството на овие два значајни конгреси претставува голем успех за институцијата и е потврда за посветеноста и професионализмот на нивните тимови.
– Овие настани не само што ни овозможуваат да ги споделиме нашите истражувања и искуства со светската медицинска заедница, туку и да се инспирираме од новите трендови и иновации во медицината. Им го честитаме успехот на двата тима и сме им благодарни што ја претставија нашата институција на највисоко ниво, потенцираат од ЈЗУ Специјализирана болница за ортопедија и трауматологија „Св. Еразмо“ од Охрид. (Крај)
извор: ОхридПрес фото: архива
| @OhridPress - Преземањето на оваа содржина или на делови од неа без непосреден договор со редакцијата на OhridPress значи дека се согласувате со условите за преземање, кои се објавени тука |
