Избор Охрид Празници ТОП ВЕСТИ

Бројни верници во манастирот Св. Наум во предвечерјето на големиот празник

Охрид, 2. јули 2024 (ОХРИДПРЕС) – Голем број верници и оваа година го посетија манастирскиот комплекс Св. Наум, во предвечерјето на празникот посветен на големиот светец Свети Наум Охридски Чудотворец, за кого меѓу народот има многу преданија и легенди.

Следејќи ја традицијата, тие го посетија манастирот и запалија свеќа за здравје и се помолија на светителот чудотворец.

Според календарот на Македонската православна црква – Охридска Архиепископија, утре е празник посветен на светецот Наум Охридски – Чудотворец, кој има силен култ и почитување меѓу граѓаните во Охрид и охридско. Тој е еден од првите ученици на светите браќа Кирил и Методиј и најблизок соработник на Свети Климент Охридски. Одиграл важна улога во ширењето на православната вера меѓу словенските народи на Балканот на словенски јазик.

Десетина години пред смртта го основал манастирот посветен на светите Архангели на Охридското Езеро. Овој манастир е денешниот Св. Наум, еден од најважните и најстарите огништа на писменоста во Словенскиот свет, каде се зачувани придобивките на Моравската мисија на св, Кирил и св. Методиј. Манастирот го одржува својот духовен живот повеќе од 1100 години. Во неговото житие се вели дека чудата на Свети Наум биле побројни од ѕвездите на небото. Бројни чуда се јавувале за време на неговиот земен живот, а посебно по неговата смрт преку неговиот дух, гробот и изворот од под карпите. За помош доаѓаат луѓе од сите краишта и од сите вери и народности. Бројни се примерите како се зачнал плод кај неродилки, како дете по две-три години заодело или прозборувало, откако неговите родители биле да му се помолат на Свети Наум. (Крај)

извор: ОхридПрес фото: Peco Bojcevski

@OhridPress - Преземањето на оваа содржина или на делови од неа без непосреден договор со редакцијата на OhridPress значи дека се согласувате со условите за преземање, кои се објавени тука