Македонската традиционална Таеквондо федерација побогата за два црни појаси втори дан
Охрид, 24. јули 2024 (ОХРИДПРЕС) – Македонската традиционална Таеквондо федерација (МТТФ) е побогата за два црни појаси втори дан, откако изминатиот викенд во спортската сала на Таеквон-до клубот „Хва Ранг ИТФ“ се организираше полагање за повисоки појаси.
Своите вештини и напредок пред жири комисијата и своите поддржувачи ги покажаа 27 спортисти од 4 различни клубови.
– Настанот беше подготвен со голема посветеност и професионалност, а секој учесник се истакна со својата уникатност и напредок, велат од Федерацијата.
– Особено внимание привлекоа двајцата учесници кои полагаа за црн појас 2-ри дан – Давид Велковски и Божидар Димитриевиќ. Овие млади таленти се четвртфиналисти на светското првенство во Пловдив, Бугарија 2019 година и носители на бројни медали и успеси. Нивните изведби беа инспиративни, покажувајќи висок степен на техника и посветеност кон Таекво-до Итф спортот. Овој значаен настан беше одржан под контрола на испитната комисија и претседателот на МТТФ, Марјанчо Лазаревски, носител на црн појас 5-ти дан, поранешен светски вицешампион во Прага 1996 година, додаваат од МТТФ.
Полагањето вклучуваше различни категории, од основни техники до напредни форми и спаринг. Учениците ги покажаа своите вештини и напредок, демонстрирајќи ја важноста на континуираната пракса и дисциплина.
Овој настан, истакнаа од Федерацијата, не само што ги поттикна учениците да ги покажат своите способности, туку и ја зацврсти заедницата на МТТФ. (Крај)
извор: ОхридПрес фото: архива
| @OhridPress - Преземањето на оваа содржина или на делови од неа без непосреден договор со редакцијата на OhridPress значи дека се согласувате со условите за преземање, кои се објавени тука |
