Успешно реализиран еТвининг проектот 100. ден во училиште во ООУ „Кочо Рацин“ во Охрид
Охрид, 30. март 2022 (ОХРИДПРЕС) – Денеска во ООУ „Кочо Рацин“ во Охрид се одржа дисеминација на eTwinning проектот 100. dan u školi 2022 (100. ден во училиште), во кој се вклучени 225 наставници од Босна и Херцеговина, Хрватска, Македонија, Србија и Турција.
– Во проектот учествуваа учениците од VI/1 и VII/2 одделение под менторство на нивните одделенски ракводители Силвана Крстеска и Татјана Лошкоска. Оваа учебна година 100-ти ден од почнувањето на учениците на училиште беше 22-ри февруари. Учениците од ООУ „Кочо Рацин“ 100. ден во училиште го одбележаа со низа интересни и стимулативни активности, преку игра и истражувачки активности поврзани со бројот 100. Активностите имаат за цел развивање на различни вештини и поттикнување на љубовта кон училиштето. Во рамките на проектот учениците од VI/1 одд. ги реализираа следните активности: креирање аватари со ознака 100 во Bitmoji; решавање 100 задачи во Bookwidgets; запознавање со историјата на банкнотата со вредност 100 од осамостојувањето на Република Македонија до денес и решавање задачи: Што можеш да купиш за 100 денари?; изработка на банкноти со свој лик во PhotoFunia; работа со податоци; 100 математички поими во WordArt; изработка на пајаци со кои учениците одредуваа парови делители на бројот 100 (тимска работа); игра икс-точка, информираат од училиштето.
Додаваат дека проектните активности кои ги реализираа учениците од VII/2 одделение се: претставување со аватар и дизајнирање на беџ; изработка на творби со употреба на цифрите од бројот 100; практични и креативни активности – мултикултурна цветна градина, садење 100 семиња; критичко размислување и решавање проблеми – ботаничка градина за 100 дена; изработка на речник по биологија; сложување на сложувалка.
– Во текот на проектот се развиваа вештини за користење на информатичко- комуникациската технологија, се поттикнуваше меѓусебното почитување, критичкото и иновативното размислување, се развиваше самодовербата и еколошката култура кај учениците, потенцираат од ООУ „Кочо Рацин“ од Охрид. (Крај)
извор: ОхридПрес фото: архива
@OhridPress - Преземањето на оваа содржина или на делови од неа без непосреден договор со редакцијата на OhridPress значи дека се согласувате со условите за преземање, кои се објавени тука |