Во вторник во Охрид ќе се одржи регионалниот настан „Дијалози за работата на полицијата во заедницата“ за југозападниот плански регион

Охрид, 22. февруари 2024 (ОХРИДПРЕС) – Во организација на Евротинк-Центарот за европски стратегии, во вторник, на 27-ми февруари 2024 година, во Охрид ќе се одржи регионалниот настан „Дијалози за работата на полицијата во заедницата“ кој ќе го обедини југозападниот плански регион.

Настанот ќе се одржи во општинската сала во Општина Охрид, а на настанот ќе учествуваат претставници на локалната полиција, локални новинари, претставници од администрациите на локалните самоуправи, граѓански организации. Ќе биде отворен и за локалните граѓани, кои ќе можат со свои размислувања и предлози да се вклучат во дискусијата.

– Дискусијата има за цел разгледување на поголемите предизвици со транспарентноста и отчетноста на полицијата во локалните заедници, со учество на локалните засегнати страни, преку комуникација со различни цивилни локални и национални актери, но и полициски структури. Дискусијата треба да резултира во предлагање практични решенија и препораки, како и подигнување на свеста на различните засегнати страни околу потребите и предизвиците на демократското полициско работење. Крајната цел е да се одговори на потребата од зголемен дијалог и комуникација кои би придонеле кон подобрени јавни политики во работа на полицијата, а во соработка со граѓаните.Настанот е во рамки на проектот „Подобрување на транспарентноста и отчетноста на полицијата во Република Северна Македонија“ за чие спроведување Евротинк потпиша Меморандум за соработка со Министерството за внатрешни работи. Во рамки на проектот ќе се одржат регионални дискусии во сите плански региони во државата, информираат организаторите. (Крај)

извор: ОхридПрес фото: ОхридПрес

@OhridPress - Преземањето на оваа содржина или на делови од неа без непосреден договор со редакцијата на OhridPress значи дека се согласувате со условите за преземање, кои се објавени тука