Позитивни критики за градскиот мешан хор „Вокс Лихнидос“ на фестивалот „ТЕХО 2021“ во Тетово

Охрид, 2. ноември 2021 (ОХРИДПРЕС) – Уште еден успешен настап на градскиот мешан хор „Вокс Лихнидос“ на јубилејниот 30-ти Меѓународен фестивал „Тетовски хорски одзиви“ – ТЕХО.

Фестивалот се одржа во духовно-културниот центар „Кирил Пејчиновиќ“ во Лешочкиот манастирски комплекс, а охридските хористи под диригентската палка на Бурим Хидри се претставија со композициите: Sicut Cervus – G.P. de Palestrina, Të falemi o dhe – R. Dhomi, Daj duni – G. Gavrilovski, Konj – arr. D. Ivanova, Besame mucho – arr. Jose Galvan и Creep – Radiohead arr. Scala and Kolacny. Нивниот настап беше поздравен од присутната публика, а не изостанаа и стручните позитивни критики од музичари и диригенти.

Охридскиот хор „Вокс Лихнидос“ успешно се прилагоди и на пандемиските услови со редовни проби и продолжија да нижат успеси, па на првото издание на Меѓународниот хорски фестивал „Мелодианум“ во Кикинда, Србија, што се одржа online, освоија златен и сребрен медал во категориите духовна хорска музика и мешани камерни хорови. Во јуни го организираа и третиот Меѓународен хорски фестивал „Гласот на Охрид“, а љубителите на хорската музика може да го погледнат на YouTube каналот на Vox Lychnidos. (Крај)

извор: ОхридПрес фото: ОхридПрес

@OhridPress - Преземањето на оваа содржина или на делови од неа без непосреден договор со редакцијата на OhridPress значи дека се согласувате со условите за преземање, кои се објавени тука