Тече пријавувањето за бесплатна вакцинација против сезонски грип

Охрид, 12. октомври 2022 (ОХРИДПРЕС) – Во тек е пријавувањето за бесплатна вакцинација против сезонски грип.

Оваа сезона граѓаните кои спаѓаат во ризичните категории тоа го прават преку страницата vakcinacija.mk и нема потреба да се прави преку матичен лекар.

– По пријавувањето се добива известување за терминот за вакцинација преку смс порака или на мејл. Кога ќе стигнат вакцините не знаеме, а ќе видиме колкав ќе биде бројот врз основа на пријавените лица, вели за Супер радио и OhridPress епидемиологот д-р Јованка Стурлакова Коровешоска.

Имунизацијата за нашиот регион најверојатно и оваа сезона повторно ќе се врши на пунктовите во охридскиот Центар за јавно здравје.

Бесплатната вакцинација против сезонски грип е наменета за стари лица (над 65 години), лица со хронични заболувања, здравствени работници, бремени жени и деца на возраст од 6 месеци до 5 години.

Покрај тоа и годинава ќе бидат обезбедени и комерцијални вакцини против сезонски грип, што ќе чинат 800 денари. И бесплатната и комерцијалната имунизација со четиривалентните вакцини ќе се реализираат паралелно.
Од ресорното министерство информираа дека вакцините се од холандскиот производител „Абот“.

Вакцинацијата против сезонски грип, што е незадолжителна, е најефикасна мерка за превенција на грип, која спречува појава на потешки форми, компликации и смртен исход особено кај ризичните групи. (Крај)

извор: ОхридПрес фото: архива

@OhridPress - Преземањето на оваа содржина или на делови од неа без непосреден договор со редакцијата на OhridPress значи дека се согласувате со условите за преземање, кои се објавени тука