Нивото на Охридското Езеро расте минимално, недоволно да се достигне просекот за овој период од годината

Охрид, 10. април 2023 (ОХРИДПРЕС) – И покрај засилените врнежи од дожд и константниот пораст периодов, сепак нивото на водата во Охридското Езеро и понатаму останува под месечниот просек.

Според денешните мерења на Управата за хидрометеоролошки работи на Република Македонија (УХМР), водата е на кота од 693,30 м.н.в, што е за 27 сантиметри под просекот за април (693,57 м.н.в), односно 20 сантиметри над дозволениот минимум (693,10 м.н.в). Температурата на езерската вода е 8,5 степени и е за 1,8 степени пониска во однос на месечниот просек.

Последнава недела езерскиот водостој е покачен за два сантиметри.

Во Охрид денес променливо облачно време со повремени врнежи од дожд. Ќе дува слаб до умерен ветер од северен правец. Максималната температура ќе се искачи до 9. степени.

– Во следните три дена времето ќе биде стабилно со пораст на дневната температура. Во петок и за време на викендот ќе има локални врнежи од дожд и ретка појава на грмежи, информираат од УХМР. (Крај)

извор: ОхридПрес фото: ОхридПрес/УХМР

@OhridPress - Преземањето на оваа содржина или на делови од неа без непосреден договор со редакцијата на OhridPress значи дека се согласувате со условите за преземање, кои се објавени тука