Радески: Чест и задоволство е да се биде домаќин на Меѓународниот натпревар GATUS 2023, каде сме постигнувале забележителни успеси
Охрид, 27. септември 2023 (ОХРИДПРЕС) – Од утре до недела Охрид и Регионалниот центар за средно стручно образование и обука (РЦСОО) „Ванчо Питошески“ се домаќини на 11. Меѓународен натпревар на ученици од угостителски и туристички училишта – GATUS 2023.
Директорот на училиштето Марјан Радески во изјава за Супер радио и OhridPress изрази огромна чест и задоволство што ќе бидеме домаќини на овој значаен натпревар. Во Охрид доаѓаат учесници од 15 училишта од земјите од поранешна Југославија, кои ќе се натпреваруваат во дисциплините готварство, угостителско послужување и подготовка на туристички аранжман, со посебен акцент на планинскиот, рурален туризам.
– Имаме учесници од Марибор, Ново Место и Радовљица (Словенија), Опатија, Осијек и Сплит (Хрватска), Бања Лука и Приједор (Босна и Херцеговина/Република Српска), Белград, Смедерево и Лесковац (Србија), Бар и Херцег Нови (Црна Гора) и Охрид, Македонски Брод (Република Македонија). Ќе се натпреваруваат околу 200 учесници, во хотелите „Метропол“ и „Белви“, каде ќе бидат и сместени, а ќе се натпреватуваат во дисциплините: готварство, угостителско послужување и подготовка на туристички аранжман, со посебен акцент на планинскиот, рурален туризам. На најдобрите и највештите учесници, ученици и ментори, ќе им бидат доделени признанија за постигнатиот успех, вели Радески.
Тој додава дека покрај официјалниот, натпреварувачки дел, за учесниците е предвидено организирано разгледување на најзначајните споменици на историјата и културата во старото градско јадро, манастирскиот комплекс „Свети Наум“ и локалитетот „Залив на коските“.
Радески потенцира дека ученици и нивни ментори од нашето училиште се редовни учесници на GATUS и постигнуваат забележителни успеси. Така од минатогодишното издание што се одржа во Словенија се вратија со два сребрени и еден бронзен медал. (Крај)
извор: ОхридПрес фото: архива
| @OhridPress - Преземањето на оваа содржина или на делови од неа без непосреден договор со редакцијата на OhridPress значи дека се согласувате со условите за преземање, кои се објавени тука |
