Лажна е дојавата за бомба во Основниот суд во Охрид, вработените се вратија на работните места

Охрид, 27. февруари 2023 (ОХРИДПРЕС) – Откако беа спроведени сите потребни проверки, утврдено е дека е лажна дојавата за бомба во Основниот суд во Охрид, по што вработените се вратија на работните места.

Рано утрово, околу 08:00 часот била примена електронска порака од непознато лице со информација дека во објектот била поставена бомба.

Како што OhridPress јави рано утрово, вработените и комплетниот персонал во Основиот суд во Охрид, утрово, нешто после 08:00 часот, беа евакуирани од просториите, откако била примена дојава за поставена бомба.

Екипи на Охридската полиција, Брза помош и Охридската пожарна излегоа веднаш на терен, по што започнаа со закон предвидените активности за вакви случаи.

За жал, ова е само продолжување на анонимните дојави за поставени бомби во средни и основни училишта, но и во институции и трговски центри, претежно во Скопје и Прилеп.

Денешната дојава за поставена бомба во Охрид доаѓа по онаа од декември минатата година, кога беше пријавена закана за поставена бомба во ОЕМУЦ „Св. Наум Охридски“. (Крај)

извор: ОхридПрес фото/видео: ОхридПрес

@OhridPress - Преземањето на оваа содржина или на делови од неа без непосреден договор со редакцијата на OhridPress значи дека се согласувате со условите за преземање, кои се објавени тука